«Çĕнтерÿ çулĕ» - çитмĕл пиллĕкре
Çирĕп утăмпа ярса пусатăн,
Ĕмĕте çĕклетĕн тÿпене.
Нумай тус-юлташлă çак хаçатăн
Тивĕç пур ларма кĕрекене.
Ентешсем паян салам яраççĕ
Районти тĕп хыпарçа савса.
Ÿсĕм-çитĕнÿ тума сунаççĕ
Çĕкленсе, сăпайлăн пуç тайса.
Умри тĕллевÿ телейлĕ пултăр,
Лăплану мĕнне ан пĕл нихçан.
Ĕмĕрех хĕвел пăхса йăл-л! култăр.
Çиле хирĕç ут, çула тухсан.
Ирĕклĕн, мăнаçлăн та янравлăн
Тăтăр-и юхса кун-çул юрри!
Манăçа ан тухтăрччĕ мухтавлă
Ĕçÿсен ытарайми тĕрри.
Лайăххишĕн тăр ялан эс çивĕч,
Пытăр ÿсĕнсе ырри кăна.
Илеме çапса хуçаймĕ сивĕ
Лирик тус тусассăн Музăна...
Летопиç çыракансен вăй-халĕ
Ĕнчĕ пек çуталтăр çиçĕнсе.
Кам пире: «Çунатсăр» тесе калĕ;
Рефрен пек тăрайтăр илтĕнсе,
Евĕк кĕвĕ, Çĕн куна чĕнсе!
Геннадий КУЗНЕЦОВ