22 августа 2003 г.
Çĕрпелти культура çурчĕн 450 çын вырнаçакан залĕ Çĕрпелте, Хурăнсур Çармăсра, Кайри Тукайра пурăнакансемпе тулнă. Кунта Чăваш Республикин Патшалăх Канашĕн депутачĕ Павел Семенов йĕркеленĕ «Çĕр пин юрă çĕршывĕнче» уяв концерчĕ пулчĕ.
Концертра чăваш халăх артистки Людмила Семенова «Саншăнах», «Тăванлăх юрри», «Çамрăклăх юрри», Чăваш патшалăх оперăпа балет театрĕн солисчĕ Константин Ефремов «Тăван ялăм», «Пĕрремĕш юрату», «Вăрманта, çырлара», «Сан ятупа», Валентина Кузнецова «Вĕç, вĕç, куккук», «Укăлчари палан», «Пĕр саншăн çеç», «Ан кай, кайăк» юрăсене чуна пырса тивмелле шăрантарчĕç. Çамрăксен «Авангард» ташă ушкăнĕнчи Михаил Петров, Светлана Семенова, Сергей Макаров тĕрлĕ халăх ташшисемпе савăнтарчĕç. Концерта музыка операторĕ Николай Майоров ăнăçлă йĕркелесе пычĕ. Лайăх концертшăн ял çыннисем артистсене чĕререн тав турĕç.