22 февраля 2008 г.
Вăрнарти 2-мĕш вăтам шкулта Çĕршыв хÿтĕлевçин кунĕ тĕлне кашни çулах ветерансемпе тĕл пулусем йĕркелесси йăлана кĕнĕ. Çакă уйрăмах вĕренекенсемшĕн пĕлтерĕшлĕ, мĕншĕн тесен шăпах вĕсене - çĕршывăн пулас хÿтĕлевçисене – патриотла воспитани пани кирлĕ.
Анчахрах акă 5-мĕш «б» класра вĕренекенсем Николай Васильевич Игонина хăнана чĕнчĕç. Вăрçă ветеранĕ хăйĕн йывăр ачалăхне, вăрçă кунĕсене хурлăхлă туйăмпа аса илчĕ. Вăрçăра ачасем çук теççĕ пулин те, Николай Васильевичăн çамрăклах вут-çулăма кĕме тивнĕ. Снаряд-бомбăсем çÿçентерекен саспа ÿксе çурăлнине, кашни утасрах сыхлакан хăрушла самантсене нихăçан та асран кăларас çук вăл. «Сирĕн çак нушана курмалла ан пултăр»,- терĕ вăл вĕренекенсемпе сыв пуллашнă май.
Иртнĕ вăрçă çулĕсем хыçра юлнă пулин те, вĕсен паттăрлăхĕ яланах пирĕн асăмра. Уяв ячĕпе сире, хаклă ветерансем, вăрçă ачисем, паттăрсем.
Источник: "Çĕнтерÿ çуле"