05 августа 2003 г.
Çуллахи каникул кунĕсем иртсех пыраççĕ. Районти шкулсен çĕр лаптăкĕсем çинче ача-пăча çу каçипех хĕрÿ ĕçре. Акă, Чăрăшкас Хирлеп шкулĕнче 5-8-мĕш классенче вĕренекенсем çуллахи практикăна черетпе çÿреççĕ. Вĕсем шкул пахчинче купăста, çĕрулми, сухан, кишĕр, помидор, хăяр, укроп, петрушка çитĕнтереççĕ. Çак çимĕçсем вĕренÿ çулĕ пуçлансан хăйсенех кирлĕ-çке.
Эпĕ пынă кун физика учителĕ Евгения Андреевна Григорьева ертсе пынипе сакăр ача йăрансене çумкурăкран тасататчĕ. Вĕренекенсем ирхине саккăртан пуçласа 12 сехетчен ĕçлеççĕ. Паян кунта тăрăшса çум çумлакансене асăнса хăварар - Андрей Скворцов, Юрий Григорьев, Николай Кузнецов, Ирина Алексеева, Настя Петрова, Галя Захарова, Павел Щуклин тата унăн шăллĕ, 3-мĕш класс пĕтернĕ Алеша Щуклин. Евгения Андреевна каланă тăрăх ачасем кутăнлашса-тавлашса тăмаççĕ, хушнине тĕплĕн пурнăçлаççĕ. Шкул пахчинче ĕçлесе тарланă хыççăн вĕсем пĕвене шыва кĕме чупаççĕ.
Халĕ шкулти коридорсене сăрлаççĕ-шуратаççĕ. Çывăх кунсенче учительсем классене çĕнĕ вĕренÿ çулне хатĕрлеме тытăнĕç - пĕчĕк юсав ĕçĕсем пурнăçламалла, тасатмалла-çумалла, тирпейлемелле. Чăрăшкас Хирлеп шкулĕ умĕнчи пахчара илемлĕ, тĕрлĕ тĕслĕ чечексем ешерни те чуна тыткăнлать. Кунти учительсем те, ачасем те ĕçе юратни тÿрех курăнать.