25 июля 2003 г.
Иртнĕ эрне вĕçĕнче Вăрнарти тырă йышăнакан предприятинче республикăри тата районти тивĕçлĕ органсен представителĕсенчен тăракан комисси пулнă, кунта çĕнĕ тырра усрама мĕнлерех хатĕрленнине тĕрĕсленĕ. Предприятинче мĕнпур оборудовани, çав шутра СЗШ-16 сушилка, автомашинăсенчен тырă пушатмалли çичĕ ГУАР-30 подъемник, виçĕ автотараса, çав шутра иккĕшĕ 30 тонна тата пĕри 15 тонна таран йывăрăшсене виçме май параканнисем, транспортерсем, ытти механизмсем йăлтах юсавлă, ĕçе хатĕр. Вунвиçĕ склад çурчĕсене пурне те кивĕ тырăран пушатса шăлса тасатнă, çуса дезинфекциленĕ. Лабораторинчи приборсене пурне те тĕрĕслеттернĕ. Вут-çулăмран сыхланса пушар сÿнтермелли машинăна, мотопомпăна яланах юсавлă тытаççĕ, огнетушительсене кирлĕ чухлĕ туяннă.
Комисси вăрнарсен ĕçне пысăк хак панă, предприятинче çĕнĕ тырра йышăнма пуренлĕн хатĕрленсе çитнине палăртнă.