Публикации » Район пуçлăхĕ çирĕп ыйтрĕ

21 июля 2003 г.

Ялсене газификацилесси, çутçанталăк ырлăхне кашни киле кĕртесси мĕнле пурнăçланса пынине район администрацийĕн пуçлăхĕ А.Кузьмин куллен тĕрĕслесе тăрать. Район администрацийĕн пай пуçлăхĕсемпе тата яваплă çыннисемпе ирттернĕ канашлура та ку тĕлĕшпе çивĕч калаçу пычĕ: халлĕхе килсене «кăвак çулăм» çитересси тивĕçлĕ шайра мар. ЧР Президенчĕ Н.Федоров газификаци ыйтăвĕсемпе йышăннă Указа пурнăçласа килес çул ку ĕçе республикăра пĕтĕмпех вĕçлемелле. Районта пурăнакансене килĕсене газ кĕртме пулăшас тĕллевпе Правительство перекет банкĕ урлă çăмăллăхлă кредит уйăрать. Чылайăшĕ вара ун çинчен пĕлмест те пулас е уссине ăнланмасть. Çавна пула ял администрацийĕсенче, библиотекăсенче ятарлă стендсем хатĕрлеме хушнă. Халăха газ кĕртме кредит парасси тата газификаци районта мĕнле пынине хаçатра çутатсах тăрăпăр. Ку тĕлĕшпе «Тÿрĕ лини» уçрăмăр. Унта сирĕн кирек хăш ыйту çине те специалистсем тĕплĕн хуравлĕç. Район администраци пуçлăхĕ А.Кузьмин яваплă çынсенчен çирĕп ыйтрĕ, палăртнине пурнăçламасан пурлăх тĕлĕшĕнчен шар курассине асăрхаттарчĕ.