04 июля 2003 г.
Июнĕн 26-28-мĕшĕсенче «Ласточка» кану лагерĕ çывăхĕнче шкул лесничиствисемпе çутçанталăк тусĕсен республикăри ХVII слĕчĕ иртрĕ. Унта тĕрлĕ районсенчи çамрăк вăрманçăсен 11 команди тупăшрĕ. Хамăр района Çарăклăри шкул лесничестви хÿтĕлерĕ. Командăра - Сергейпа Андрей Спиридоновсем, Всеволод Куликов, Виктор Андреев, Света Антонова тата Марина Ильина.
Ачасен тĕп конкурссемсĕр пуçне - çамрăк вăрманçă, ботаник, зоолог тата «кăвак патруль» - виçĕ кун хушшинче хаçат кăлармалла, хăйсен юрлас-ташлас пултарулăхне, спортри хастарлăхне кăтартмалла пулчĕ.
Вăрманçăсен конкурсĕнче С.Спиридонов пĕрремĕш, В.Куликов тăваттăмĕш вырăнсем йышăнчĕç, Хисеп грамотисем тата асăнмалăх парнесем илме тивĕçрĕç. Хурт-кăпшанкăсене, вăрманти чĕрчунсен пурнăç паллисене пĕлессипе А.Спиридонова çитекенни пулмарĕ, вăл ыйтусем çине тĕрĕс те туллин хуравлама пултарчĕ. Çавăн пекех агитбригадăсен пултарулăх конкурсĕнче çарăклăсем пĕрремĕш, спорт спартакиадинче виççĕмĕш вырăна тухрĕç. Пĕмĕмĕшле кăтартусемпе вара Çарăклăри шкул лесничестви тăваттăмĕш пулчĕ. Çамрăк лесовода Сергей Спиридонова вара Тутарстанра иртекен регионсем ăмăртăва хутшăнма республикăн пĕрлештернĕ команди йышне илчĕç.
Кунсăр пуçне слетра шкул лесничествин иртнĕ вĕренÿ çулĕнчи ĕçĕсем пирки унăн ертÿçи В.А.Спиридонов отчет туса пачĕ.