23 марта 2007 г.
Нумаях пулмасть кун çути курнă Чăваш энциклопедийĕ хула, район тата муниципалитет библиотекисене çитме пуçланă. Çак тĕллевпе çĕнĕ издание 800 экземпляр уйăрса панă.
Кунсăр пуçне Чăваш Енри шкулсен библиотекисене 650 экземпляр параççĕ. Республикăн Культура министерстви пĕлтернĕ тăрăх, Чăваш Ен тата чăваш халăх çинчен хатĕрленĕ пысăк калăпăшлă та паха энциклопедисĕр пĕр библиотека та юлмасть.
Библиотекăсене справка изданийĕпе республика бюджечĕн укçи-тенки шучĕпе тивĕçтереççĕ. Энциклопедин пĕрремĕш томĕ пĕтĕмпе пилĕк пин тиражпа пичетленсе тухнă. Чылайранпа кĕтнĕ кĕнекене сутма пуçланă та ĕнтĕ. Энциклопедие Чăваш кĕнеке издательствин тата Чăваш бибколлекторĕн мĕнпур кĕнеке магазинĕсенче 590 тенкĕпе туянма пулать.
Малтан палăртнă тăрăх, иккĕмĕш том çак çул вĕçĕнче кун çути курмалла.
Источник: "Çĕнтерÿ çуле"