28 октября 2006 г.
Чăваш Республикин Культура, национальноçсен ĕçĕсен, информаци политикин тата архив ĕçĕн министерстви, республикăри ача-пăча библиотеки «Чăваш ен» фонд пулăшнипе ирттерекен «Çĕнĕ ятсем уçатпăр» виççĕмĕш конкурса пĕтĕмлетнĕ. Кăçал унта 12-24 çулсенчи 79 çамрăк пĕтĕмпе 100 ĕç тăратнă. Вĕсенчен 46-шĕ - чăвашла, 54-шĕ - вырăсла.
Виçĕмçул йĕркеленĕ конкурсра пирĕн ĕçтешĕмĕр Елена Тикинева унта хăйĕн «Пирĕшти» повеçĕпе дипломант пулса тăнăччĕ, Хапăсри Таня Иванова çĕнĕлле çырнă «Колобок» пьесипе номинант ятне илнĕччĕ.
Кăçалхи конкурс çĕнтерÿçисем хушшинче те Вăрар районĕн пултаруллă çамрăкĕсем пур. «Чăвашла проза» номинацире, акă, Алина Трофимова пĕрремĕш вырăн йышăннă. Ку номинацирех Люда Лукинан ĕçне те палăртнă.
«Вырăсла поэзии» номинацире, шел те, вăрнарсенчен çĕнтерекенсем пулман. Çапах та Наталия Антонован ĕçне лайăххисен шутне кĕртнĕ.
«Чăвашла поэзии» номинацире Андрей Михайлов пĕрремĕш вырăна йышăннă.
Çĕнтерÿçĕсене çак эрнекун Г.Лебедев ячĕллĕ интернат-лицейра саламлаççĕ. Вĕсен ĕçĕсем «Çĕнĕ ятсем уçатпăр» кĕнекере кун çути кураççĕ.
Источник: "Çĕнтерÿ çуле"