22 февраля 2006 г.
Нумаях пулмасть районти тĕп модельлĕ библиотека «Пушкин библиотеки» мегапроект урлă çĕнĕ кĕнекесемпе пуянланнă. «Класс тулашĕнчи вулав» серинчи комплектра 130 кĕнеке, вĕсем – хальхи вăхăтри писательсен, публицистсен произведенийĕсем.
Искусство альбомĕсем, энциклопедисем, культурологи, маркетинг, мемуарсен, биографи сери кĕнекисем библиотека фончĕшĕн уйрăмах хаклă. Вĕсем шкул ачисен тавракурăмне анлăлатма, ăс-хакăлне ÿстерме май парĕç. Çак мегапроект йĕркипех библиотекăна çавăн пекех «Эрмитаж (Хĕвеланăç Европа искусстви)», «Раççей историйĕ. ХХ-мĕш ĕмĕр», «В.И.Дальăн ăнлантару словарĕ» CD – ROM-сем кÿрсе килнĕ. Вĕсем те хушма пĕлÿ процесĕнче пысăк вырăн йышăнаççĕ.
«Пушкин библиотеки» мегапроектăн тĕп тĕллевĕ – тĕрлĕ çĕршыв библиотекисене вырăсла çырнă экономика, право, гуманитари тата социаллă наукăсен, справочник тата энциклопеди изданийĕсемпе, ача-пăча тата илемлĕ литературăпа комплектлама пулăшасси, информаци пĕрлĕхне аталантарасси.
Источник: "Çĕнтерÿ çуле"