18 января 2006 г.
Каламасăрах паллă, пушар – хăрушă инкек. Вăл пĕр шелсĕр пĕтĕм пурнăçа çапса хуçма пултарать. Вут-çулăмра мĕн чухлĕ тупра пĕтет, мĕн чухлĕ çын пурнăçĕ вăхăтсăр татăлать пулĕ.
Иртнĕ çулта, акă, районта 12 уйăхра 68 пушар алхаснă, вĕсенче 8 çын пурнăçран уйрăлнă. Çапла, пĕлтĕр вут-кăвар пĕтĕмĕшле 970 пин тенкĕлĕх сăтăр кÿнĕ, 3 техника хатĕрĕ сиенленнĕ, 49,7 тонна выльăх апачĕ çунса кайнă.
«Хĕрлĕ автан» ытларах чухне çынсен айăпĕпе пулать. Сăмахран, вут-кăварпа асăрханусăр пулнă пирки 15 пушар тухнă. Сÿнтермесĕр урайне пăрахнă е çывăрса кайнă ÿсĕр çын аллинчен тухса ÿкнĕ пирус тĕпне пула çулăм час-часах алхаснине палăртмалла. Пĕлтĕр кунашкал 10 тĕслĕх пулнă. Электричество приборĕсем юсавсăррине пула 11, электричество проводисен кĕске замыканине пула 5 хутчен вут-çулăм кĕрленĕ. Ачасем шăрпăкпа вылянă пирки час-часах инкек курма пулать (пĕлтĕр – 7 тĕслĕх). Çавăнпа ачасене килте хăйсем тĕллĕн хăварма юрамасть, шăрпăксене вĕсем çитеймен вырăна пуçтарса хумалла. Газ приборĕсемпе усă курнă чух асăрханусăр пулнишĕн иртнĕ çул икĕ пушар тухнă. Çавăн пекех юриех вут тĕртнĕ 7 тĕслĕх çинчен те асăнмалла. Тата ытти сăлтавсемпе пĕлтĕр районта пилĕк хутчен «хĕрлĕ автан» авăтнă.
Иртсе кайнă декабрь уйăхĕнче кăна вут-çулăмра Оттикăвă, Çĕрпел, Кăмпал ялĕсенче пĕтĕмпе тăватă çын вилнĕ. Инкек тухнă вăхăтра вĕсем пурте ÿсĕр пулнă.
Çÿлте асăннине шута хурса, вырăнти пуçлăхсене лару-тăру япăх çемьесемпе пушар хăрушсăрлăхĕ тĕлĕшпе профилактика ĕçĕсене ирттерме, никам пурăнман пушă çуртсене уйрăм шута илме сĕнетпĕр.
Источник: "Çĕнтерÿ çуле"