21 декабря 2005 г.
Аçăмçырминчи вăтам шкулта ачасене физкультурăпа туслаштарас тĕллевпе çулсеренех тĕрлĕрен мероприятисем ирттереççĕ. Кăçалхи декабрь уйăхне, акă, сывлăха çирĕплетмелли уйăхлăх тесе палăртрĕç. Унăн тĕллевĕ – ачасене сывă пурнăç йĕркине явăçтарасси, физкультурăпа туслаштарасси, ÿт-пĕве пиçĕхтересси, усал йăласенчен сивĕтесси.
Малтанхи кунсенчех классем хушшинче «Савăнăçлă стартсем» иртрĕç. Тĕрлĕрен вăйăсем, хусканусем пурнăçласа хăйсен ушкăнĕсенче 4, 8 тата 11 класс ачисем çĕнтерÿçĕсем пулса тăчĕç.
«Атте, анне тата эпĕ – спортпа туслă çемье» конкурсра 5-мĕш класс ачисемпе вĕсен ашшĕ-амăшĕсем тупăшрĕç. Хĕрÿ кĕрешÿре Юпшик Ялтăра ялĕнчи Николаевсен çемйи 1-мĕш вырăна, Кăмпал ялĕнчи Константиновсем çемйи 2-мĕш вырăна, Аçăмçырминчи Ивановсен çемйи 3-мĕш вырăна тухма тивĕçлĕ пулчĕç.
Çак уйăхлăхра ялти çамрăксене спортпа туслаштарма Аçăмçырми тăрăхĕнчи ялсем хушшинче волейболистсен турнирĕ иртрĕ. Шкулти спортзалра 6 команда мала тухассишĕн тупăшрĕ. Унта Чăрăшкас Хирлеп ял çамрăкĕсем ăста вылярĕç, 1-мĕш вырăна çĕнсе илчĕç. 2-мĕш вырăнта Тăвальушкăнь Ялтăра çамрăкĕсем тухрĕç, 3-мĕш вырăта Аçăмçырми каччисем. Ял çамрăкĕсем кун пек турнира кашни çулах ирттерме палăртса хăварчĕç.
Источник: "Çĕнтерÿ çуле"