12 декабря 2005 г.
Халĕ ял хуçалăхĕнче, тĕпрен илсен, мĕнпур ĕçсене техника вăйĕпе пурнăçлама тăрăшаççĕ. Ĕлĕкрех уй-хир пуянлăхне пухса кĕртмелле-и е выльăх-чĕрлĕх фермисенчен продукци нумайрах илмелле – лашасен вăйĕпе те анлă усă курнă. Пурăна киле çак ырă йăла, темшĕн, йăларан тухрĕ, чылай хуçалăхра лашасем усрама пăрахрĕç.
Паянхи пурнăç лашасем çине чун-чĕрепе пăхма хистет. Техникăпа топливо хакланнине пула лаша вăйĕпе усă курни хуçалăхшăн питех те усăллă, вăл продукци хăй хаклăхне чакарма май парать. Акă мĕншĕн «Мураты» ял хуçалăх кооперативĕн ертÿçисем лашасене пĕтерме шутламарĕç. Вĕсен шучĕ халĕ çирĕме яхăн. Урхамахсене хуçалăхăн кирек-хăш ĕçĕнче те çулталăк тăршшĕпех курма пулать.
Лашасене Юрий Гордеевич Гордеев, çур ĕмĕр ĕнтĕ тăрăшса пăхаканскер, ватлăхри канăвне тухнă пулин те, юратнă ĕçĕнчен пăрахмасть.
Хуçалăхра Юрий Гордеевич пек хисеплĕ çынсем ытларах пулччăр. Ахальтен мар унăн ырă ĕçне ял-йыш пысăка хурса хаклать.
Источник: "Çĕнтерÿ çуле"