17 апреля 2004 г.
Çулталăкăн пĕрремĕш кварталĕ хыçа юлчĕ. Мĕнле улшăнусем пулса иртрĕç-ха çак вăхăтра загс пайĕнче; Кăçалхи виçĕ уйăхри кăтартусем çакăн пек. Çут тĕнчене пурĕ 106 пепке килнĕ, пĕлтĕрхи çак вăхăтрипе танлаштарсан 10 ача сахалрах.
Анчах пурнăçран уйрăлакансен шучĕ пурпĕр нумай-ха, виçĕ уйăхра пурĕ 219 çын вилнĕ (пĕлтĕр ку вăхăтра 208 пулнă). Çав шутра 99-шĕ - арçынсем, 120-шĕ хĕрарăмсем. Ытларах 55 çултан иртнĕ çынсем пурнăçран вăхăтсăр уйрăлаççĕ, кунашкалисем 164 çын, 40-55 çулхисем - 40, 30-39 çулхисем - 8.
Çемье çавăракансем те çулран çул сахалланса пыраççĕ. Кăçалхи çула йывăр çул теççĕ те, тен, çавăнпа пулĕ çамрăксем мăшăрланма тăхтаса тăраççĕ. Пĕлтĕр çак вăхăтра 39 çемьене регистрациленĕччĕ, кăçал 30 кăна.
Пĕр-пĕринчен уйрăласси вара нимĕнле вăхăта та пăхмасть. 2004 çулхи январь-март уйăхĕсенче 31 мăшăр уйрăлнă.
Загс пайĕнче районти демографи лару-тăрăвĕ еплерех улшăнни тĕкĕр çинчи пек курăнать. Юлашки вăхăтра Раççей Правительстви халăхăн социаллă пурнăçне лайăхлатассипе нумай тимлет, çавăнпа çынсем хушшинчи хутшăнусем те лайăх енне улшăнасса шанас килет.Источник: "Çĕнтерÿ çуле"