25 февраля 2004 г.
Ачасен пултарулăх çуртĕнче республикăра йĕркеленĕ «Музей тата ачасем» эрне программипе килĕшÿллĕн «Çамрăк экскурсовод» конкурс иртрĕ. Унта шкулсенчен килнĕ 19 экскурсовод хутшăнчĕ. Вĕсем конкурса хутшăнма шкулсенчи музей материалĕсемпе усă курнă. «Аслă Отечественнăй вăрçă çынсен шăписенче» заочнăй экскурси ирттерчĕç. Конкурса хатĕрленсе ачасем ветерансемпе вĕсен тăванĕсем патĕнче пулнă, нумай материалсем, çав шутра çырусем, тĕрлĕрен документсем, наградăсем пухнă. Çапла майпа вĕренекенсем халăхăн Аслă Отечественнăй вăрçă çулĕсенчи паттăрлăхне тата лайăхрах туйса илнĕ.
Конкурсра Вăрманкасри шкулта вĕренекен Владимир Ефимов çĕнтерчĕ. Иккĕмĕш вырăнта Туçи Мăратри Елена Петровапа Надежда Кириллова, виççĕмĕшĕнче Вăрнарти 1-мĕш вăтам шкулти Андрей Егоров. Аçăмçырминчи Анна Герасимовапа Мария Михайлована, Вăрнарти 2-мĕш вăтам шкулти Екатерина Панькована, Упнерти Алиса Степанована, Санарпуçĕнчи Альбина Иванована, Çĕрпелти Ольга Феофановапа Инна Васильевана хавхалантармалли приз тата грамота пачĕç.
Источник: "Çĕнтерÿ çуле"