13 января 2010 г.
Патшалăх пушар асăрхавĕн районти уйрăмĕнчен пĕлтернĕ тăрăх, кăçал пĕрремĕш пушар январĕн 5-мĕшĕнче Шуркасси Ишек ялĕнче алхаснă. «Хĕрлĕ автан» хăйĕн хаяр сассине пани çинчен пушар сÿнтерекенсене ирхине 8 сехет иртсен пĕлтернĕ. Электропроводкăн кĕске замыканине пула тухнă вут-çулăм пĕр хуçалăхра мунчана юрăхсăра кăларнă.
«Анчах унтан та хăрушăрах инкек Çĕнĕ çул уявĕсем вăхăтĕнче Вăрнарта тухма, темиçе çын пурнăçĕ татăлма пултарнă», - пĕлтереççĕ пушар хуралĕн ĕçченĕсем. Вăрнарта пĕр хваттерте пурăнакансене, тĕрĕссипе, кÿршĕсем пулăшу вăхăтра чĕнни кăна инкекрен çăлса хăварнă.
Çĕнĕ çулăн иккĕмĕш кунĕ - кил хуçисен уяв кăмăл-туйăмĕ хĕрсех пынă. Вĕсем плита çине апат лартнă, анчах «хаяррипе ĕнтĕркенĕскерсем» хăйсем çывăрса кайнă. Савăт вĕриленсе хĕрсе кайнă, хваттере тĕтĕм сарăлма пуçланă. Юрать-ха, кÿршĕсем çакна хăвăрт сиснĕ, пушар чаçне васкавлăн шăнкăравланă. Пушар сÿнтерекенсем вăхăта сая яман, тĕтĕмленнĕ хваттере балкон урлă кĕнĕ, унтан тăватă çынна кăларнă. Енчен те кÿршĕсем килте пулман-тăк е ытти сăлтавпа никам та япăххине сисмен-тĕк, калама та йывăр - мĕнпе вĕçленетчĕ тимсĕрлĕх;
Уяв хыççăн уяв. Хăшĕ-пĕрисен асăрханулăх çинчен шутлама та вăхăт çук. Çÿлерех асăннă пек хăрушă самантсем ан пулччăр тесен çак тапхăрта тимлĕхе вăйлатмаллине асăрхаттараççĕ патшалăх пушар асăрхавĕн районти уйрăмĕн ĕçченĕсем.
Источник: "Çĕнтерÿ çуле"