28 ноября 2009 г.
Февраль уйăхĕнче Вăрнарта пулса иртнĕ хăрушă инкек пирки районта чылай вăхăт калаçрĕç. Поселокра пурăнакан М., каçхине сунар пăшалĕпе урама тухнăскер, пĕр хĕрарăма хăй килĕнчех персе вĕлернĕччĕ, тепĕр арçынна амантнăччĕ. Нумаях пулмасть, çын вĕлерекен тĕлĕшпе суд айăплав йышăнăвĕ кăларнă: 43-ри арçынна 15 çуллăха ирĕкрен хăтарнă.
Мĕн палăртнă-ха следстви ĕçĕсем вăхăтĕнче тата материалсене судра пăхса тухнă май; Маларах каларăмăр, арçын каçхине «сунара» тухнă. Пасар территорийĕнче вăл хуралçăна тапăннă, ăна пăшал кĕпçипе пуçран çапнă. Телее, хуралçă ирсĕртен тарма пултарнă.
Урамра ăнсăртран сунарçă тĕлне пулнă арçын та «кĕпепе çуралнă» пулĕ - вилĕмрен çăлăнса юлнă. Пăшал тытнă арçын унтан шăрпăк ыйтнă. Анчах лешĕ кăшт утса кайсан ăна çурăмран пенĕ. Аманнă çын пурпĕрех тарса ÿкнĕ.
Сунарçă вара лăпланайман. Хăй урамра амантнă арçын çывăхри çуртра пулĕ тесе вăл подъезда кĕрсе кайнă. Пĕр хваттере шăнкăравланă та алăка уçакана тÿрех кĕрслеттернĕ. Çапла ним айăпсăр хĕрарăм ирсĕр аллинчен вилнĕ.
Экспертиза суд тенкелĕ çине ларнă арçын психика тĕлĕшĕнчен сыввине кăтартнă (унччен вăл шалти ĕçсен тытăмĕнче ĕçленĕ, Чечняра командировкăра пулнă). Ку кăткăс ĕçе республикăн Аслă сучĕ присяжнăй заседательсем хутшăннипе пăхса тухнă. Вĕсем М. айăплă тесе йышăннă, приговор тăрăх (вăл вăя кĕмен-ха) срока унăн çирĕп режимлă колонире ирттермелле.
Источник: "Çĕнтерÿ çуле"