11 февраля 2009 г.
Этем тени ĕçпе паха теççĕ. Тăрăшуллă çынсем ик-виç ĕне усрама та вăй çитереççĕ. Çăвĕпех выльăх-чĕрлĕхе хĕл лайăх каçарас тесе пуç çĕклемесĕр ĕçлеççĕ, гектарĕ-гектарĕпе курăк çулса утă хатĕрлеççĕ. Тепĕр чух ĕçлени харама кайнă пек туйăнать: пĕр литр сĕтшĕн пирĕн тăрăхра 6 тенкĕ кăна параççĕ. Капла хушма хуçалăха епле аталантарăн; Канаш, Красноармейски, Елчĕк районĕсенче хăть сĕте 8 тенкĕпе пуçтараççĕ. Хамăр районта, Туçи Çармăс, Кĕçĕн Кипек, Енĕш енче, пурăнакансен ĕçне мĕншĕн хисеплемеççĕ;
Сĕт хакне ÿстермелли çинчен «Хресчен ĕçне хакламалла» статьяра автор тĕрĕс каланă. Ял çыннине ĕçлеме хавхалантармаллах. Вара çĕршыв тата тĕреклĕрех пулĕ. Çĕр ĕçченĕн çулталăкĕнче ырă улшăнусем пуласса шанас килет.Источник: "Çĕнтерÿ çуле"