17 января 2009 г.
Тунтикун, январĕн 19-мĕшĕнче, православи тĕнне ĕненекенсем пысăк уява паллă тăваççĕ - çав кун Иисус Христос Иордан шывĕнче тĕне кĕнĕ. Хĕллехи çак уява чăвашла Кăшарни е Турă пăр çине анни теççĕ, вырăсла - Крещение. Çав вăхăтра виçĕ кун хушши çăлри, пĕвери, юханшыври шыв çветтуй шутланать. Кăшарнинче чиркÿсенче иртекен кĕлĕсене халăх уйрăмах йышлă хутшăнать, çветить тунă шыва илсе юлма тăрăшать. Турă пилне илес, чир-чĕртен сывалас ĕмĕт-тĕллевпе хăшпĕрисем вак касса юханшывра е пĕвере шыва кĕреççĕ. Иртнĕ ĕмĕрĕн тăхăрвуннăмĕш çулĕсен пуçламăшĕнче çак йăла Вăрнар тăрăхĕнче те пурнăçа кĕме тытăннă. Сивĕрен хăраманнисем унтанпа кашни çулах Кăшарнинче Вăрнар шывĕнче, çавăн пекех хăшпĕр ялсенчи пĕвесенче-кÿлĕсенче чăмпăлтатаççĕ.
Кăшарнинче ваксенче шыва кĕнĕ чухне хăрушсăрлăха тивĕçтерессипе мерăсем йышăнас тĕллевпе район пуçлăхĕ А.Кузьмин йышăну тунă, 14 çынтан оргкомитет йĕркеленĕ тата организациллĕ-массăллă ĕçсен планне çирĕплетнĕ. Оргкомитет председателĕ - район пуçлăхĕн пĕрремĕш заместителĕ - ял хуçалăхĕпе экологи пайĕн пуçлăхĕ А.Борисов. Çавăн пекех район пуçлăхĕн йышăнăвĕпе Вăрнар хула тата ялсен поселенийĕсен пуçлăхĕсене Кăшарнинче ваксенче шыва кĕнĕ вăхăтра хăрушсăрлăха тивĕçтерессипе тивĕçлĕ мерăсем йышăнма хушнă.
Источник: "Çĕнтерÿ çуле"