13 декабря 2008 г.
Вăрнар район прокуратури предприятисемпе-организацисенче ĕçлекенсен ĕç тÿлевĕн прависемпе çыхăннă саккунсене пăхăннине çирĕп тĕрĕслесе тăрать. РФ Ĕç кодексĕн 133-мĕш статйинче тата «Ĕç тÿлевĕн чи пĕчĕк виçи çинчен» федераллă саккунăн 2-мĕш статйинче палăртнă тăрăх, уйăхра ĕç вăхăчĕн тата ĕçĕн нормисене тултарнă çыннăн ĕç укçи тÿлевĕн чи пĕчĕк виçинчен сахал пулма пултараймасть.
Кăçалхи июнĕн 24-мĕшĕнче йышăннă федераллă саккунпа килĕшÿллĕн, 2009 çулхи январĕн 1-мĕшĕнчен пуçласа ĕç тÿлевĕн уйăхри чи пĕчĕк виçи 4330 тенкĕпе танлашĕ.
РФ Ĕç кодексĕн 22-мĕш статйинче ĕç укçине туллин тÿлессишĕн ĕç паракан яваплине палăртнă. Çавна май Вăрнар район прокуратури районти пысăк организацисемпе предприятисен ертÿçисем ячĕпе - ĕç саккунлăхне пăсни пулмалла марри çинчен асăрхаттарусем, район администраци пуçлăхĕ ячĕпе информаци янă.
Ĕçлекенсен прависене хÿтĕлесси - прокуратура ĕçĕ-хĕлĕн тĕп енĕсенчен пĕри. Енчен те ĕç тÿлевĕ тĕлĕшпе сирĕн правăна хĕсĕрленĕ пулсан, район прокуратурине килме сĕнетпĕр. Пирĕн адрес: Вăрнар поселокĕ, Ленин урамĕ, 75-мĕш çурт, телефон номерĕ: 2-11-52.
Источник: "Çĕнтерÿ çуле"