22 октября 2008 г.
Нумай хваттерлĕ пурăнмалли çуртсенче тĕплĕ юсав ĕçĕсене ирттернипе паллашма тата укçа-тенкĕ уйăрасси мĕнле пурнăçланнине пăхса тухма, юнкун района ЧР Хула строительствипе обществăлла инфраструктура министерствин представителĕсем тĕрĕслевпе килсе çитнĕ. Чи малтанах вĕсем район администрацийĕн пурăнмалли çурт-йĕрпе коммуналлă хуçалăхшăн яваплă подразделенисен, финанс службисен, подряд организацийĕсен тата Управлени компанийĕн ертÿçисемпе тĕл пулнă, юсав ĕçĕсен шайне тата финансировани тытăмне мĕнле йĕркеленине сÿтсе явнă.
Вăрнарти 19 тата Калининăри 2 нумай хваттерлĕ çуртсене тĕпрен юсаса çĕнетме кăçал федераллă тата республика шайĕнче тата район бюджетĕнчен пĕтĕмĕшле 60 миллион тенкĕ ытла уйăрма палăртнине пĕлтернĕччĕ ĕнтĕ. Çавăн пекех çурт-йĕр харпăрлăхçисен те 5 процент чухлĕ тÿпе хывмалла. Вăрнарти çуртсене пăхса тăракан «Интех» общество Управлени компанийĕнче акă, ку ыйтăва сÿтсе явма хваттерсен хуçисене ятарласа пухнă, пĕр вăхăтри тÿлеве халĕ хăйсен укçи-тенкинчен пурнăçлассине, харпăрлăх тытакансен ку парăма виçĕ çулта пайсемпе татмаллине пĕлтернĕ. Компани йышăнăвне ăнланма пулать - çакă юсав ĕçĕсем пыракан çуртсенчи хваттер хуçисен хывмалли суммăна тÿлесе татма çăмăллăхсем парĕ. Минстрой представителĕсем район укçисене те, харпăрлăхçăсен тÿпине те октябрĕн 1-мĕшĕнчен кая юлмасăр хывмаллине палăртнă. Вĕсем çавăн пекех юсав хутса ăшăтмалли тапхăр пуçламăшне чăрмав кÿмелле маррине, пĕтĕм ĕçсене октябрĕн 10-мĕшĕ тĕлне вĕçлемеллине çирĕплетсех каланă. Кунсăр пуçне документаципе ĕçлемелли йĕрке çинчен те туллин ăнлантарнă, вырăнти специалистсене кăсăклантаракан чылай ыйтăва хуравланă. Тĕрĕслевпе килнисем юсав пыракан обьектсене те çитсе курнă.
Источник: "Çĕнтерÿ çуле"